1167. Mise en gage. (Où apparaît le nom de Cabalbi)

Sources :

• Document original conservé aux Archives Départementales de la Haute-Garonne à Toulouse sous la cote H MALTE TOULOUSE 20, pièce n° 13 (Fonds de Malte).
• Photos réalisées par l'atelier photo des Archives Départementales
• Transcription : Mireille Castaing-Sicard "Les contrats dans le très ancien droit toulousain (X^e-XIII^e siècle)", pages 595 et 596.
• Traduction réalisée par Bramayre.

Sciendum est quod Arnaldus Fortius et Toseta, uxor ejus, miserunt in pignore Poncio Arnaldo de Morlanis et suo ordinio unum aripentum malolis, cum terra in qua est, quod tenent de fratribus Hospitalis ubi vocant ad Castellum Novum, inter malole Bernardi Cabalbi et malole Petri Guillelmi mercatoris et terram Hospitalis et carrariam publicam, per .XXX. solidos morlanenses bonos. (…)

Sachent tous qu’Arnaud Fort et Toseta [Fillette en occitan], sa femme, ont mis en gage à Pons Arnaud de Morlaàs et à sa succession un arpent de vigne, avec sa parcelle, qu’ils tiennent des frères Hospitaliers, appelée de Château Neuf, située entre la vigne de Bernard Cabalbi et la vigne de Pierre Guillelm marchands et le terrain des Hospitaliers et le chemin public, pour 30 sols morlans. (…)

Accord entre Esclarmonde DESTRAVILLE, Bernard CABALBY, et Marguerite de DORIE

Source :

• Acte original passé le 17 mars 1590, chez Maître Jean MANAULE notaire à Saint-Girons.
• Copie originale insinuée au parlement de Toulouse le 25 juin 1590.
• Registre des insinuations conservé aux Archives Départementales de la Haute-Garonne à Toulouse (Série B insinuations, registre 4^e, folio 364 recto et suivants) ; registre microfilmé sous la cote 2Mi1034.
• Transcription réalisée par Bramayre

Accord dentre esclarmonde et pierre destreviles de sainct yvars dune part Et bernard Cabalby de sainct girons, Et damoizelle marguerite de dourye

Saichent tous presans et advenir Que lan mil cinq cens quatre vingtz Et dix Et le dix septiesme Jour du moys de mars en la ville de sainct girons au dioceze de gouzerans et seneschaucee de thoulouze, Apres midy en presance de moy notaire royal et tesmoings bas nommes, Dict a este par les parties soubz escriptes proces estre en la court de monsieur le seneschal de thoulouze Entre, esclarmonde destraville vefve a feu pierre daulon de sainct ybars heretiere a feu marcial destraville son pere Et pierre destraville son frere quand vivoict dudict sainct girons demanderesse en desistat, Et aultrement deffanderesse dune part, Et bernard cabalby filz et coheretier de feu pierre cabalby marchant dudict sainct girons, et damoizele marguerite de dorie relicte dudict feu pierre cabalby desfendeurs Et aultrement Ledict bernard suppleant en Reconvention contre ladicte destraville dautre, et procede a demandes et desfances Et aultres actes Et a pour raison et cause de la vigne appellee de castaings assize en la juridiction et terroir dudict sainct girons Contenant quarante ou cinquante journalz a fossoier ou envyron Confronte avec Raymond heretiers a feu maistre pierre destienne Avec barthelemy vidal Et hoirs de audiague Et aultres confrontations et apartenances Plus de vng patu de Maison seituee en la place dudict sainct girons Et pareilhement de vne Maison de fours en ladicte ville seituee, et Rue appellee de ballegon confronte avec ladicte rue, avec les hoirs de bilhonteau Et heretiers de feu Maistre guilhiem Calvet Comme estant des biens et heredite dudict feu marcial destraville Desquelz vigne patu de maison, Et maison de fours lesdicts cabalby et dorie Auroient faict aparoir des tiltres et achaptz a ladicte esclarmonde destraville Premierement dudict patu de maison auroient faict aparoir de lachapt faict par ledict feu pierre cabalby audict feu martial destraville son beau pere pour la somme de deux cens livres tournois par Instrument passe entre lesdictes parties le Second daoust mil v^c Cinquante six Retenu par Maistre guilhaume de deo notaire royal dudict sainct girons Et de ladicte maison, des fours ont aussi faict aparoir par Instrument dachapt faict par ledict feu cabalby audict feu martial destraville pour la somme de septante cinq livres quinze solz tournois Avec pacte de rachapt La mesme somme de septante cinq livres quinze solz, Instrument retenu par maistre pierre tournier notaire dudict sainct girons le quatorziesme de febvrier mil Cinq cens soixante deux Estant ledict feu martial destraville debiteur a feu maistre guilhaume ribalz prestre et recteur dudict sainct girons de la somme de seize cens livres tournois par oblige passe entre lesdictes parties retenu par maistre benoist domein notaire royal de la ville dagen le penultiesme de mars mil Cinq cens cinquante sept Que afaulte davoir entierement satisfaict audict debte feu maistre anthoine ribalz heretier et frere dudict feu ribalz auroict mis en Instance feu pierre destraville heretier dudict feu martial son pere et donne peyronne de rey vefve dudict feu martial Et mere tutrisse dudict pierre son filz Et apres par santance darbitres prononcee le dixhuictiesme de may mil v^c soixante cinq ledict pierre destraville heretier auroict este condempne envers ledict Rivalz heretier dudict feu recteur pour le Reste de ladicte somme de seize cens livres despans donmaiges et Intherest En la somme de huict cens trante troys livres payables a la feste de toussainctz apres ladicte prononciation prochain Comme par ladicte santance retenue par maistre marc dupuy notaire royal dudict sainct girons De laquelle somme ledict ribalz auroict faict transport a feu Jean raymond molhet merchant de la roque delmes au dioceze de mirepois comme par acte dudict Transport retenu par Maistre bernard cabalby notaire royal du lieu de vic en Gouserans du douziesme Septembre mil v^c soixante cinq ancien style Et nayant satisfaict audict terme ledict moulhet auroict faict saisir et prandre en vertu des loies de la court de monsieur le Seneschal de thoulouse ladicte vigne de castaint avec ses apartenances audict pierre destraville Et procede aulx Inquantz dont pour fouyr a plus grandz despans Ladicte de rey mere tutrisse et gouvernaresse dudict pierre Auroict faict vante audict pierre cabalby avec pacte de remedere Certaines reservations de deux pipes de rerevin pour chaque an Et aultres pactes Prevus en linstrument passe Et Retenu par Maistre michel goudail notaire du lieu doust audict viscomte le quatriesme Jour du moys de Janvier Mil v^c Soixante six pour ladicte somme de huict cens trante troys livres tournois Que ledict pierre cabalby se chargoict paier Et aquicter ledict debte Envers ledict molhet Ce quauroict faict comme appert par acte et acquict du Cinquiesme doctobre mil cinq cens soixante six Retenu par maistre helies dupuy notaire de sainct girons Dont ayant apareu a ladicte esclarmonde destreville desdicts actes Ensemble dune santence arbitralle prononcee le vingtiesme decembre mil v^c soixante neuf dentre lesdicts de Rey et destraville son filz Et ledict pierre cabalby par laquelle ledict destraville estoict condempne paier audict cabalby la somme de deux cens quatre vingtz cinq livres dix huict solz dix deniers tournois laquelle luy est deue ensemble la somme de vingt neuf livres quatorze solz de fournitures faictes aux prestres de la confrerye de corpore christi par obiit fonde par ledict destreville Et pour les funebres de ladicte rey auroict fourny dix sept livres neuf solz troys deniers Plus auroient fourny lesdicts heretiers de feu pierre cabalby pour les tailhes et oblies de la metterie Et maison dudict destraville de vingt ans ou plus montant soixante livres tournois, et plus Et neanmoings pour les rantes et obiitz que lesdicts heretiers destraville font vingt livres tournois, ou plus et demandoient deux cens livres et plus pour la despence et entretenement dudict pierre destraville Lequel despuis lannee mil cinq cens septante que sadicte mere fust decedee lauroient entretenu de tous allimentz Jusques a lannee mil cinq cens quatre vingtz quatre extimant ledict temps cent escus sol pour le moings et aultres menues fornitures quilz disent avoir faictes et fournies par ladicte estraville, Au contraire ladicte esclarmonde destraville demandoict suivant ledict Instrument de Rachapt de ladicte vigne de castans estre en bon estat et valleur comme estoict au temps dudict achapt questoict de valleur et estimation de six ou sept cens escus sol Et que aujourdhuy est Ruinee par le desfault et mauvaize menagerie desdicts cabalby et dorye Et la valleur et extimation de deux pipes re vin de ladicte vigne de chescune annee despuis ledict achapt Jusques a lannee mil vc quatre vingtz six que ledict destreville est decede estant de commune extimation Lune annee avec laultre de six ou sept escus sol pour chescune annee que reviendront a cent cinquante escus et plus, Aussi demandoict les tonneaux pipes barriques mentionnees ausdicts actes Et que pour le regard des tailhes et oblies payees par lesdicts heretiers dudict cabalby ne montent tant comme demandoient et moings la despance que disoient avoir faicte audict pierre estraville parce que du temps que lont nourry ledict destraville les servoict de lacquay et a tous services de maison questoict emploie Et aultres destinctions resultant dudict proces Pour lequel a la part et cottite de ladicte damoiselle de dorie Et pour La moytie quelle prend et luy apartient de ladicte heredite Et biens dudict feu pierre cabalby ayant faict la moytie desdictes fournitures, Ont accorde lesdicts de dorie et esclarmonde destraville sans prejudice de laultre moytie pour le Regard de la cottite dudict bernard cabalby Coheretier en laultre moytie de ladicte hereditte dudict pierre son père En la fourme et pacte que sensuict Cest que establys noble pierre domenc escuier et ladicte damoyzelle de dorie maries dune part et ladicte esclarmonde dautre lesquelz de gre ladicte de dorie de licence dudict son mary laquelle luy A bailhe pour passer le presant Instrument ont Revocque Audict proces et procedure tant que touche la part de ladicte de dorie quest la moytie et ont accorde et convenu que pour le regard dudict patu de la maison de la place dudict sainct girons vandu par ledict feu martial destraville Audict feu pierre cabalby suivent linstrument dachept dessus mentionne ladicte esclarmonde destraville A declaire ne y prethandre droict ne Action et pour la maison desdicts fornes dessus limites et engaiges par ledict feu marcial pere Audict feu pierre Cabalby vendu les fruiictz Avec pacte de Remedere pour septante cinq livres quinze soubz tournoiz que presantement ladicte destreville vend rehaute la plus vailhance de ladicte maison et fours ausdicts maries pour le pris et somme de cent septante cinq livres fournois revenant Suivent lordonnence A la somme de cinquante huict escus sol ung tierz et pour la major vallance de ladicte moytie de vigne de castans la part de ladicte de dorie ladicte esclarmonde destreville aprouvant ladicte vandition faicte par ladicte feue de Rey sa mere comme trutisse et gouverneresse dudict pierre destraville Audict feu pierre cabalby sur les pactes et conditions portes par ledict Instrument dachept retenu par ledict goudailh A vendu Ausdicts domenc dict de Aramis et dorie mariez ladicte moytie et plus valance de ladicte vigne pour la part de ladicte de dorie pour le pris et somme de cent trente cinq livres tournoiz Revenant A quarante escus sol et moyenant lesdictes vantes ont Acorde que lesdicts domenc et dorie mairis Randront audict bernard cabalby trente sept livres dix sept soubz et six deniers tournoiz quest la moytie et cotitte de la moytie que ledict bernard doibct recouvrer dudict engaigement et vante des fruictz desdicts fornes et compensant et Acquisant la moytie du debte de deux cens quatre vingt cinq livres dix huict soubz six deniers tournoiz pourtes par la sentence Arbitralle du xx^e decembre mil v^c soixante neuf et des fornitures et despences Alleguee par ledicte de dorie A sadicte part pour la moytie Pour consideration de ladicte majour valhance de ladicte Moytie de vigne et des reyrebins et choses dessus demandes par ladicte destreville Sans comprandre le grand tonneau que ledict bernard cabalby tient ny la partie de ladicte hereditte quest A la part dudict bernard cabalby ce tienent quictes lung A laultre respectivement demurant de net Pour Raison desdictes venditions de toute ladicte maison desdicts fours et de ladicte Moytie de vigne de castans a la part de ladicte dorie la somme de cent escus sol que seront bailhes et deslivres Reallement A ladicte destreville Scavoyr quarante escus sol presentement et soixante escus sol que seront bailhes quent ladicte destreville Aura Acquite le douaire et leguat de Mariete tussualbe relicte dudict feu pierre destreville et pour ce que ladicte relicte est mariee A presant Avec joseph de castilhon ne possedant biens Avent prandition ladicte somme sera tenu bailher bonnes et sousfizantes cautions et cependant lesdicts daramis et dorie maries paieront A raison du denier doulze pour chascune Annee Commencent A la presante tant que tiendront ladicte somme et quant seront lesdicts deniers Assures pour bonnes Cautions lesdicts daramis et dorie seront tenus bailher ladicte somme laquelle somme de quarante escus sol A este fornie par ledict Aramis Reallement Icelle en pieces de vingt soubz et de quinze soubz de ses deniers propres et entre lesdictes destraville et dorie se sont tenues de toutes choses aquictes et compenses et ladicte destraville sera tenue et A promis pourter eviction et garentie Ausdicts daramies et dorye en Jugement et de hors envers tous et contre tous Se desvestissent desdictes pieces et donnent toute plus valleance de presant et a ladvenir Et Pour Authoriser le present Accord et transaction ont faictz leurs procureurs en ladicte court de monsieur le seneschal de thoulouse tous procureurs praticquens en ladicte court et chacun deux Avec toute puissance A ce Requize et Necesscaire et pour ce faire A tenir lesdictes partyes ont obliges respectivement tous et chacuns leurs biens meubles et Imeubles presans et advenir lesquelz ont soubzmis Aux forces et Rigeurs des courtz temporelles du Presant Royaulme de france et ont Revocque A toutes Revocations A ce de droict Requises et necessers et Ainsin lont promis et jure sur les sainctz evengilles nostre seigneur de quoy lesdictes partyes ont Requis A moy Notaire Royal soubzsigne leur en Retenir Acte ce quay faict en presances de Noble Andre de sellan seigneur de sabolies Noble bernard cabalby Maistre Rech duffaur baichellier ez droictz et juge de lezat pierre salvat viex jammet faur maistre tainturier jacques portal / barthelemy lafaige Bertrand Assier et pierre vilhonteau dudict sainct girons habitans et lesdicts sellan Cabalby faur Assier / lafaige salvet et vilhonteau soubzsigne A la cede originelle Avec ledict daramies / Aramies / Sabolies / R / duffaur B Cabalby / P / Salvet / P vilhonteau / B lafage bertrand assier tesmoings Ainsin Signes et de moy Jehan Manaule notaire Royal de la ville de sainct girons soubzsigne / jmanaule notaire Royal Signe

Auront compareu maistres Annet Salanie et anthoine Salanie procureurs en ladicte court Scavoyr ledict maistre Annet pour lesdicts s^r domenc et damoy^lle dorye mariez et ledict maistre Anthoine pour ladicte esclarmonde destraville chacun pour ses partyes en ce que leur conserne suivent leur charge et puissance resultant du susdict Instrument dacord et transsaction ont Requis et consentent lauthorisation Insinuation et registre du sudict Acte parties tenues garder et observer le contenu en Icelle A thoulouze le v^e de jung mil v^c nonante / Salanies Ainsin signes

Attandu que pour le presant Acte contenent Accord et transaction Appert le Roy ny Avoyr Aulcung Intherest nempeche linsinuation et registre Requis A thoulouze ce dix neufiesme jung mil v^c iiii^xxdix dupin procureur du Roy signe

Jehan de la valette ex A Tous ceulx quy ses presantes verront salut scavoyr faisons et Atestons huy datte des presentes A lissue du conseil de nostre court de matin Pardevent maistre francoys de cambolas lieutenent principal en ladicte seneschaucee Avoyr compareu les susdicts salanies lesquelz chacun faisant pour sa partye Reprenent leurs Requisitions cy dessus transcriptes ont perciste en Icelles et ce faisant Requis lauthorisation Insinuation et registre du presant Instrument dacord et transaction ouy sur ce et consentant le procureur du Roy Auroict Este ordonne que le presant Instrument dacord et transaction estoict tenu pour Insinue Authorise en registres de nostre court pour servir Aulx partys y Interposant le decret et authoritte judicielle comme de ce plus A plain Appert par les Actes et Registres de nostre court Attestent en tesmoing de quoy ses presantes ont este expediees signes et selles A Thoulouze le xxve Jour de jung mil v^c iiii^xxdix de gourassel notaire royal signe Jansoud greffier Signes

Achat de Bertrand de CABALBY contre Hector de NARBONNE

Source :

• Actes originaux passés le 22 juin 1598 à Saint-Girons (Michel Pagenel notaire de Saint-Girons), et le 24 janvier 1599 à Pointis (Jean de Lourde notaire de Vic)
• Copie originale insinuée au parlement de Toulouse le 30 avril 1599.
• Registre des insinuations conservé aux Archives Départementales de la Haute-Garonne à Toulouse (Série B insinuations, registre 8^e, folio 762 verso et suivants) ; registre microfilmé sous la cote 2Mi1043.
• Transcription réalisée par Bramayre

Achapt de Bertrand de Cabalby Contre Messire hector de Narbonne

Saichent Tous presans et Advenir Que Lan mil Cinq cens quatre vingtz dix huict et Le vingt deuxiesme jour du moys de juing heure de midy dans la ville de sainct Girons et Chasteau du seigneur viscompte de ladicte ville au diocese de Coserans et seneschaucee de Thoulouse Regnant Tres crestien prince henry par la Grace de dieu Roy de france et de navarre en presance des Tesmoingz bas nommes et de moy nothaire Royal Soubzsigne Comme Ainsin soict et dict a este que feu messire michel de narbonne viscompte de sainct Girons et Couserans Le vingt deuxiesme septembre mil Cinq Cens soixante quatre eust vendeu a maistre bernard Cabalby bachelier ez droictz notaire Royal et Juge Ordinaire du visconte de Coserans La seignurie du Lieu dolus et conseigneur du lieu de seix audict viscompte de Cozerans avec Les droictz et apertenances pour Le pris de Cinq cens Livres tournoys Avec pacte de Remere et Reserves mentionnees en Lachap et pacte de Remere sur ce passe entre Lesdictes parties Reteneu par maistre valentin danglure nothaire Royal de la Cite de sainct Lizert despuis Le quartorziesme jour du moys de decembre mil Cinq cens soixante Cinq auroict faict Ledict seigneur de narbonne viscompte susdict La vante pure sans Rachapt desdictes seignuries de Olux et seix A La part dudict seigneur viscompte pour Le pris de tretze Cens livres Tournois A Locasion que Ledict seigneur viscompte pour achapter Le droict de Leude et Couppe de Grains de la pierre et aultres droictz a la part du prieur de la ville de sainct Girons Auroict eu besoing de deniers Comme par instrument dachapt passe entre Lesdictes parties Reteneu par maistre marc dupuy nothaire Royal de ladicte ville Ledict jour et despuis aprouve et Confirme par dame margueritte de pardailhan dame dudict sainct Girons et messire de narbonne baron Leur filz qui auroict Receu Cinquante livres ou plus pour Ladicte Ratisfication et avec procuration expresse faicte par ledict seigneur viscompte Reteneu par Ledict dupuy Ledict Cabalby auroict este mis en pocession Realle actuelle et corporelle et faictz et prins Les homages desdicts habitans dolux et seix en Tel cas Requis et pocede Lesdictes seigneuries jusques au jour present Sans Contradiction Sy Auroict fourny et preste A feu messire Aymeryc de narbonne visconte dudict sainct Girons et Coserans dernier decede en son vivant par bilhetz traites et Cedules Revenans a Cent Cinquante escuz Et neantmoingz Le doutziesme Aoust mil Cinq cens nonante six auroict preste A dame philiberte dornesan dame viscomptesse dudict sainct Girons et a messire hector de narbonne seigneur viscompte dudict sainct Girons et Coserans son filz La somme de vnze cens dix Livres Tournois de laquelle se seroict Oblige A Rendre et payer Lung pour Lautre et Lung seul pour tout dans lan ou passer sur La plus valeue et majeur vailhance desdictes seignuries dolus et Seix par Instrument Reteneu par maistre michel pagenel notaire Royal dudict Sainct Girons Ledict jour PLus Auroict fourny Audict seigneur hector viscompte vingt escuz sol par cedulle du vingt Troysiesme mars mil Cinq cens nonante sept PLus par autre cedulle du dernier Octobre audict An quatre vingtz escuz sol Et Parce que presantement messire jean de sainct jan et damoyselle francoyse de Comenge filhe heretiere de feu heugue de Comenge seigneur de poinctis viscompte dudict Couserans et vallees derce vstol et eycheil et de sire anthoine Rogier de Comenge viscompte desdictes valees son frere demandoict et ont obteneus jugementz Contre ledict seigneur de narbonne pour Certaine somme de deniers A plain mentionnees en Linstrument dacord et Obligation passe entre Ledict seigneur michel de narbonne visconte et messire hugues de Comenge visconte dudict Coserans et vallees derce vstel et eycheil Le vingt quatriesme Octobre mil Cinq cens soixante sept Reteneu par maistre helies dupuy nothaire Royal dudict sainct Girons pourtant promesse et Obligation et ypothecque de la somme de dix neuf cens Livres sur La plus valeur desdictes seigneuries dolus et seix que dudict Achapt faict par Ledict Cabalby Laquelle somme Lesdicts de sainct jean et comenge maries demandoint et en auroint obteneus jugementz Et despuis voulant acorder et satisfaire avec Lesdicts de sainct jean et damoiselle francoyse de Comenge maries Lesdicts seigneur hector de narbonne visconte susdict de ladvis et bonne volonte de ladicte dame philiberte dornesan dame dudict sainct Girons sa mere Laquelle Lauroict Authorise et preste Consantement A La passation du present instrument que Aussy de Ladvis de dame margueritte de narbonne sa femme et du consantement desdicts de sainct jean et de Comenge Auroict voleu vendre Toutz Les droictz devoirs que Luy pourroint Rester sur Lesdictes seigneuries dolus et seix A Noble bertrand de Cabalby escuyer et donnataire esmansippe par Ledict bernard Cabalby son pere en ses pactes de mariage avec damoiselle Gabrielle de sers que pour subenir Au payement de ce quest deub ausdicts de sainct jean et de Comenge auroict faict et passe Acte de vente en la forme que sensuit Cest que Les an jour Lieu et heure que dessus Estably Ledict messire hector de narbonne authorise de ladvis et consantement de ladicte dame dornesan sa mere Aussy de ladvis de ladicte damme de narbonne sa femme et du Consantement desdicts seigneurs de sainct jean et de Commenge maries Presant Ledict de sainct jean Lequel a promis faire adnonner et Ratisfier Le Conteneu au presant Instrument a ladicte damoyselle de Commenge sa femme quen Requis en sera Lesquelz Toutz de Gre et franche volonte ont Approuve et aprouvent et confirment Lesdicts achaptz en La forme que ont este faictz et passes desdictes seignuries dolus et seix et promis ny contravenir Comme Aussy Ledict seigneur hector seigneur visconpte A approuve et confirme Tout ce que a este faict par cy devant et en tant quest besoing A vendeu vend a perpetuitte Audict bertrand de Cabalby presant et aceptant toute majeur baillance droictz vois devoirs et actions que y pourroint avoir Luy Les siens presans et advenir prethendre quereller ny demander sans Reserve aulcune desdictes seigneuries dolus et seix Moienant Le pris et somme que pardessus Lesdicts achaptz et sommes susdicts Ledict seigneur bertrand de Cabalby A baille illec Realement La somme de Cinq cens escuz de Troys Livres Lescu Laquelle somme Ledict seigneur de sainct jean seigneur de Poentis A Receue illec dudict seigneur visconte par mains dudict bertrand Cabalby en quartz descu deux cens trente neuf escuz deux Tiers Six escuz demy cartz Septante escuz sol en douseins dix neuf carnes lestous Realz setze escuz sol Setze escuz en pieces de dix et vingt soulz Trente troys escus dor a troys Livres Cinq soulz piece six pistoles de quatre escuz pistoletz a tretz Livres piece Six pistolles de deux escuz a six Livres dix soulz piece deux ducades de quatre ducatz A setze Livres piece et quatre doubles ducatz A huict Livres piece Cinq doubles henrrys a sept Livres piece six escuz pistoletz despaigne A Troys Livres troys soulz piece et Trente soulz en monoye Illec Realement nombree et comptee Receue par Ledict seigneur de sainct jean Le Tout montant A La susdicte somme de Cinq Cens escuz sol pour payement du debte a luy et a sadicte femme deub et suivant Ledict Oblige et jugementz Obteneus Contre Ledict seigneur de narbonne de quoy sen sont teneus Comptans et payes et en Ont quicte Ledict seigneur de narbonne et Cabalby promectant ne demander autre chose Et Ledict seigneur de narbonne a Aussy quicte Ledict seigneur Cabalby et promis Le faire jouir desdictes seigneuries droictz deboirs et appertenances envers Toutz que y demanderoint Rien promectant ne Luy Rien plus demander Comme aussy Lesdictes dammes dornesan et de narbonne ont promis ne Luy Rien plus demander ains Luy donnent et quictent tout droict quelles y pourroint appartenir Et Pareillement Ledict seigneur depoentis A promis Garantir Ledict Cabalby pour Le Regard de ladicte somme de Cinq cens escuz sol quil a prinse envers toutz et contre Toutz qui demanderont Lesdict droictz Et Pour Lauthorisation du present acte et acord Ont faictz leurs Procureurs en la Court de monsieur Le seneschal de thoulouze Toutz procureurs et praticans en Icelle et Chascun deux pour Consantir A Lauthorisation du present Instrument et pour ce faire et tenir Lesdictes parties Ont Oblige leurs Perssonnes et biens Respectivement que ont soubzmis a toutes Rigeurs et Courtz du present Royaulme de france et autres et ont Renonce a toutes Renonciations de droict et faict Au present Contraire et ainsin Lont jure de quoy lesdictes parties Ont Remis A moy dict nothaire de leur en Retenir acte et Instrument Ce quay faict en presences de noble phelip de la pene Maistres pierre de villenufve nothaire Royal de miramond Noc odiage jean pontac praticiens dominicque sabrit et anthoine majou de Thoulouze et sainct Girons habitans signes a la cede Originelle Avec Lesdictes parties Philiberte dornesan Couserans M de narbonne G de s^t jehan Cabalby P de vileneufve La penne pontac sabrit Audriague A majou ainsin signes Et de moy michel pagenel notaire Royal habitant de la ville de sainct Girons soubz signe M Pagenel notaire Royal signe

Lan mil Cinq cens nonante neuf et Le vingt quatriesme jour du moys de janvier au chasteau de pouentys diocese de Comenge et seneschaucee de Thoulouze heure de matin en presences de moy nothaire Royal et Tesmoingz soubz escriptz establie en perssonne damoyselle francoyse de Comenge viscomptesse de Coserans en vallees duston dece escheil et Lespingue feme de messire Gaudens de sainct jean seigneur de pouentis et viscompte aussy dudict Coserans Laquelle de licence et permission dudict seigneur de sainct jean viscompte laquelle luy A baillee pour passer Le Conteneu du present Instrument certisfiee de la vente faicte par messire hector de narbonne viscompte de sainct Girons de Ladvis et Consantement dudict seigneur de sainct jehan envers noble bertrand de Cabalby seigneur dolus conseigneur de seix audict viscompte de Coserans de la plus valeur desdictes seigneuries dolus et seix pour Le pris et somme de Cinq cens escuz de Troys Livres Lescu Receue par Ledict de sainct jehan pour payement du debte et obligation que feu messire michel de narbonne viscompte dudict sainct Girons estoict deviteur A feu messire hugues de Comenge viscompte dudict Couserans et pere de ladicte damoyselle francoise de Comenge et par jugement Obteneu par lesdicts de sainct Jean et de Comenge maries Contre ledict hector de narbonne viscompte dudict sainct Girons Comme plus a plain est conteneu en Linstrument de ladicte vente Reteneu et Rigne par maistre Michel paginavel nothaire Royal de ladicte ville de sainct Girons du vingt deuxiesme de juing mil Cinq cens nonante huict duquel lecture Luy a este faicte de Teneur ex Sachent ex Sy a cause de vriesvete mis a Incerer Laquelle dicte damoyselle francoyse de Comenge Suivant Icelluy et promesse faicte par Ledict seigneur de sainct jean son mary de la faire adnoner et Ratisfier Le Conteneu dudict Instrument dachapt faict par ledict de Cabalby de ladicte seigneurie daleus et seix de Gre et franche volonte a Ratisfie et aprouve et confirme Ladicte Acquisition et achapt faict par Ledict de Cabalby achapteur present et Aceptant en la forme et maniere quest passe et promis par ledict seigneur de sainct jan son mary sen Tenant Comptant et paye de ladicte somme de Cinq cens escuz mentionnes audict achapt Comme Receus par sondict mary de son Consantement a promis ne Rien plus demander audict de Cabalby ny aux siens heritiers soubz Ipothecque et obligation Renonciation et droict et faict y necessaire Ainsin la jure sur Les sainctz evangilles nostre seigneur de quoy Ledict seigneur de Cabalby a Requis a moy jehan Lourdo nothaire Royal du lieu de vict au viscompte de Coserans Luy en Retenir Acte ce quay faict en presences de noble jehan de sirgand escuyer pierre Cambons jehan dauro daulon et valentine jean Gosens dudict valentine Tesmoingz a ce apelles soubzsignes a la cede du present G de s^t jean f de comeng desirgan j dauro p decambons j Gousens et de moy nothaire signe delourde nothaire ainsin signe

Comparans Maistres Bernard Salbet Et Jean fortanier Procureurs en la court de monsieur le seneschal de Thoulouze scavoir Ledict fortanier Pour Le susdict bertrand Cabalby Achapteur que presantant le present Contract dachapt par Luy faict Le vingt deuxiesme de juing mil Cinq cens quatre vingtz dix huict et acte de Ratisfication faicte dicelluy par damoyselle francoyse de Comenge femme A messire Gaudens de sainct jehan seigneur de pouentis et viscompte de Couserans A Requis en verteu de la procuration Inceree audict Contract et Attandeu ladicte Ratisfication Iceulx estre Authorises Insignues et Registres Au Registre de La presente Cour pour servir Comme de Raison Et Ledict Salbet Pour Ladicte de Comenge Comprinse et nommee Audict Contract en vertu de la procuration y Inceree et veu La Ratisfication et aprouvation dIcelluy du vingt quatriesme de janvier dernier en ce que La Conserne A Consanty et Consant a ladicte Authorisation Insignuation et Registre neatmoings par tant quest besoing Le Requiert A Thoulouze Le dernier jour du moys dapvril mil v^c iiii^xx xix Salbet Et fortanier Signes

Le procureur du Roy en la seneschaucee veu Le susdict Contract de vente et Ratisfication dIcelluy attandeu que sa mayeste ny a pour Le present Intherest sur Lauthorisation et Insignuation Requise sen Remest A Thoulouze ledict jour Philipon procureur du Roy signe

Jean de La valette ex A Toutz ceux quil apartiendra salut Savoir faisons et atestons que ce jourdhuy datte des presentes en nostre cort yssue du conseil pardevant Messire francoys de Clary ex Auroict Compareu Les susdicts salvet et fortanier procureurs Chascun pour sa partie suivant Leur procuration lesquelz Reprenant Leurs Requisitions sus Incerees Ont perciste en Icelles et sur ce Ouy et Consantant le procureur du Roy en la seneschaucee Par Ledict seigneur Juge mage a este sur ce Ordonne veu Lacte de ladicte Ratisfication dudict jour vingt quatriesme janvier faict par Ladicte de Comenge que Le susdict Contract dacquisition dudict jour vingt deuxiesme juing quatre vingtz dix huict est Teneu pour authorise et sera Insignué et Registre au Registre de la presente Court pour servir Comme de Raison Intherposant le decret et authorite judiciere sauf le droict du Roy et Lautruy sy poinct en I a lequel enregistrement auroict este despuis faict Comme de ce Les actes et Registres de nostre court atestent en tesmoing de quoy ces presantes ont este expediees A Thoulouze le dernier apvril mil v^c iiii^xx xix de Clary Juge Mage Registre Crosat Signes